2026-жылдын 31-мартында Жалал-Абад эл аралык университетинде ЖАЭУнун жалпы профессордук-окутуучулук курамынын катышуусунда «ВАКтын жоболорунда белгиленген талаптарга жана критерийлерге сереп» аттуу семинар өткөрүлдү. Семинарды илим, мамлекеттик тил жана социалдык иштер боюнча проректор т.и.к., доцент Асилова Зульфия Атамырзаевна өткөрдү.

Иш-чаранын жүрүшүндө Кыргыз Республикасында жогорку квалификациядагы илимий жана илимий-педагогикалык кадрларды аттестациялоонун улуттук системасын реформалоого байланышкан өзгөртүүлөргө кеңири талдоо жүргүзүлдү.

Семинардын алкагында катышуучулар Кыргыз Республикасынын Илим, жогорку билим берүү жана инновациялар министрлигине караштуу Жогорку аттестациялык комиссия жөнүндө, диссертациялык кеңештер жөнүндө, окумуштуулук даражаларды ыйгаруунун жана окумуштуулук наамдарды берүүнүн тартиби тууралуу жаңы жоболор менен таанышышты. Өзгөчө көңүл диссертациялык изилдөөлөрдүн тематикасына коюлган жаңыланган талаптарга, изденүүчүлөрдүн жарыялоо активдүүлүгүнө, диссертацияларды коомдук талкуулоо жол-жоболоруна, ошондой эле алдын ала коргоо жана ачык коргоону уюштуруу маселелерине бурулду.

Бул семинардын өткөрүлүшү университеттин профессордук-окутуучулук курамы, жаш окумуштуулар, изденүүчүлөр жана илимий жетекчилер үчүн чоң мааниге ээ, анткени ал ВАКтын актуалдуу талаптары менен өз убагында таанышууга жана жогорку окуу жайдагы илимий-изилдөө иштеринин сапатын жогорулатууга өбөлгө түзөт.